දරුවන් සහ කාන්තාවන් ගෘහ සේවයට යොදා ගැනීමේ දී සිදුවන අකටයුතුකම් වළක්වාලීමේ අරමුණින් දේශීය ගෘහ සේවකයින් ලියාපදිංචි කිරීමේ වැඩපිළිවල සැකසීම වැදගත් බව කාන්තා හා ළමා සංවර්ධන, පෙර පාසල් හා ප්රාථමික අධ්යාපන, පාසල් යටිතල පහසුකම් හා අධ්යාපන සේවා රාජ්ය අමාත්ය පියල් නිශාන්ත මහතා පැවසීය.
නුවරඑළිය දිස්ත්රික්කයේ දරුවන් මුහුණ දෙන ගැටළු සාකච්ඡා කිරීම උදෙසා නුවරඑළිය දිස්ත්රික් ලේකම් කාර්යාලයේ පසුගිය දා පැවති ප්රගති සමාලෝචන රැස්වීමකට එක්වෙමින් අමාත්යවරයා මෙම අදහස් පැවසීය.
මෙම අවස්ථාවට නුවරඑළිය දිස්ත්රික්කයම ආවරණය වන පරිදි පොලිස් ළමා හා කාන්තා කාර්යාංශයේ නිලධාරීන් සහ ළමා සහ කාන්තා කටයුතු අමාත්යාංශයේ නිලධාරීන් එක්ව සිටියහ. දරුවන් සම්බන්ධව දෛනිකව වාර්තා වන සිදුවීම් විශ්ලේෂණය කොට අවදානම් ප්රදේශ හඳුනා ගැනීම සඳහා නව පරිගණක යෙදවුමක් භාවිතා කිරීම සම්බන්ධව ද මෙහිදී සාකච්ඡා විය. ජාතික ළමාරක්ෂක අධිකාරිය විසින් එම පැහැදිලි කිරීම සිදුකළ අතර ඒ හරහා දරුවන්ට වැඩි අවදානමක් ඇති ප්රදේශ හඳුනාගෙන එම ප්රදේශ සඳහා විශේෂිත වැඩසටහන් සකස් කිරීමට හැකියාවක් ලැබෙන බව ඔවුහු කියා සිටියහ
අවාසනාවන්ත ලෙස මියගිය හිශාලිනී දියණියගේ මව සහ ඥාතීන් නුවරඑළිය දිස්ත්රික් ලේකම් කාර්යාලයේදී රාජ්ය අමාත්ය පියල් නිශාන්ත මහතා ඇතුළු මැති ඇමතිවරුන් හමුවු අතර එහිදි එම පවුල වෙත පෞද්ගලික මූල්ය පරිත්යාගයක් රාජ්ය අමාත්යවරයා විසින් සිදුකල අතර මාස තුනක් ඇතුලත එම පවුලට නිවසක් ඉදිකර දීමටත් ස්වයං රැකියාවක් ආරම්භ කිරීමට අවශ්ය ආධාර ලබාදීමටත් කටයුතු කරන බව පැවසීය.
මෙම අවස්ථාවට අමාත්ය ගරු සි.බි රත්නායක මැතිතුමා, රාජ්ය අමාත්ය ගරු ජීවන් තොන්ඩමන් මැතිතුමා, හිටපු අමාත්ය ප.ම ගරු එස්. බී දිසානායක මැතිතුමා, රාජ්ය ලේකම් කුමාරි ජයසේකර, නුවරඑළිය දිස්ත්රික් ලේකම් නන්දන ගලබඩ යන මහත්ම මහත්මීන්, කාන්තා හා ළමා සංවර්ධන, පෙර පාසල් හා ප්රාථමික අධ්යාපන, පාසල් යටිතල පහසුකම් හා අධ්යාපන සේවා රාජ්ය අමාත්යාංශයට අදාල නුවරඑළිය දිස්ත්රික්කයේ සියලු ක්ෂේත්ර නිලධාරීන් හා නුවරඑළිය දිස්ත්රික්කයම ආවරණය වන පරිදි පොලිස් ළමා හා කාන්තා අංශයේ නිලධාරීන් ද සහභාගී වූහ.
